Gunvor Guttorm «Douiji» (nordsamisk versjon)

303
4 min
Porterttfoto av Gunvor Guttorm
Foto: John Erling Utsi

Transkripsjon

Gunvor Guttorm:
Duodji lea sámi kreatiivvalaš doaibma, mas leat ruohttasat sámi árgaeallimis.

 

Muitaleaddji:
Die gullet Gunvor Guttorma, gii lea duodjeprofessora Sámi allaskuvllas Guovdageainnus. Son lea iskan Britta Marakatt-Labba dáidaga, ja veardádallan dan duoji ektui, ja ávnnasgeavaheami, bargoproseassa ja ođđasitgeavaheami hárrái. Muhto máid mearkkaša duodji sámi eallimii?

Gunvor Guttorm:
Ja movt lea leamaš sámi eallin? Na, birgejupmi lea leamaš guovddážis. Min máttut elle dáppe davvin Sámis, ja ii hal sidjiide lean beare oastit juohke lágan biergasiid, nu ahte lei hui iešbirgejeaddji servodat. Sii fertejedje ieža ráhkadit buot máid dárbbašedje. Ja nie lei ge duoji álgu.

Muitaleaddji:
Áiggiid mielde lea duodji ovdánan, ja maiddái fátmmastan osiid vierrásiid dáiddabargguin.

Gunvor Guttorm:
Maiddai vieris olbmot, eara álbmogat leat beroštišgoahtán sámi kultuvrras, ja dasto čilgegoahtán iežaset sániiguin mii sámevuohta lea, ja mii duodji lea, nu go sii oidnet daid. Dalle leat geavahan doahpagiid nu go «folkekunst», «husflid», «håndverk» ja «kunsthåndverk», Ruoŧa bealde «slöjd», ja Suoma bealde «käsityö».

Muitaleaddji:
Gunvor deattuha ahte duodji lea sámegiel’ doaba ja sámi doaibma, muhto ahte dat ii leat nu earálágan go eará giehtaduojit ja dáiddaduojit ahte dain eai leat oktasaš bealit maiddái.

Gunvor Guttorm:
Ii nu gal leat. Muhto dat earenoamaš kulturgelbbolašvuohta mii sámiin lea, ja várra eará eamiálbmogiin maid lea sin kultuvrra ektui, ferte čalmmustahttojuvvot olu eambbo.

Muitaleaddji:
Gunvor Guttorm ja Britta Marakatt-Labba leaba leamaš bargoustibat ja olbmážagat olu jagiid juo. Dalle go Britta studeregođii dáidaga, de golai muhtin áigi ovdalgo gávnnai iežas dáiddavuogi.

Gunvor Guttorm:
Muhto go de vuos gávnnahii ahte áiggui bargat gorrojuvvon hearvagovaiguin, de fuomášii ahte dát gusto lei sutnje hui lunddolaš. Orro leame nu ahte ávkkástalai das máid lei oahppan duodjebarggus ruovttustis. Duddjon lei doppe duogážis – buot su dáiddabargguin vuhtto duodji.

Son han dadjá ieš ge ahte hálida čuovvut olles bargoproseassa, álggu rájes dassážii go lea gárven dáidaga. Son geahčada ávdnasiid. Son báidná daid vai ivnnit šaddet juste nu go dáhttu. Son árvvoštallá makkár ávdnasiid dárbbaša. Duojárat eai bálkes boares dujiid, muhto baicca geavahit daid vuođđun ođđá dujiin. Nu dahká maiddái Britta dáiddabarggustis – son ođđasitgeavaha.