Gina Gylvera «Garjját/Kråkene» (nordsamisk versjon)

Muitaleaddji:
70-loguid loahpageahčen álgá Álttá-Guovdageainnu čázádaga dulvadanriidu.

Nuorra sámi dáiddár Britta Marakatt-Labba searvá vuostálastimii, mii šadda okta dain guhkimus ja dovdoseapmos miellačájehemiin Norggá historjjas.

NRK:
Ellos eatnu, ellos eatnu/

Muitaleaddji:
1981s vuoittáhallet akšunisttat.

/NRK:
Odne iđđes dolvo buletiijat eret 14 miellačájeheaddji/

Muitaleaddji:
Britta Marakatt-Labba dáidagis «Garjját», mii heaŋgá dán vistti seinniin, oaidnit buletiijaid girdime dego nealgegarjját ja doalvume eret buot vuostálastiid – dego mat njiellame buot máid gávdnet.

Dál fertejit sápmelaččat vuot doarrut eiseválddiid vuostá, ja bieggafápmohuksema vuostá Fovsenis. Natur og Ungdom, Luondu ja Nuorat-organisašuvnna jođiheaddji, Gina Gylver, muitala iežas leamaš diđošteame Fovsena 2022s.

Gina Gylver:
Beanta ludde olbmo váimmu oaidnit man stuorrát ja viidát luonddubillisteamit leat, man olu bieggaturbiinnat doppe leat, ja man olu luottat ja geađgegubát maiddái leat báhcán maŋŋelgo leat bávkalan doppe. Ja go boazodoallit ieža muitalit vásáhusaideaset birra, go oainnán sin bákčasiid, man olu dát lea vahágahttan. Lea surgat oaidnit. Ja nu hal dat lea ge, ahte go olmmoš ieš vásiha juoida, deaivvada olbmuiguin geaidda dat váikkuha, de dovdá eambbo geatnegasvuođa. Ii leat nu álki beare guođđit báikki ja vajálduhttit ášši.

/Duogášjietna/

40 jagi maŋŋil Álttá-riiddu, rihkkojuvvojit olmmošvuoigatvuođat ja eamiálbmotvuoigatvuođat ain, ja issoras luonddubillisteamit joŧket ain. Eai oro oahppan maidege historjjás, eai oba ipmirge ahte sii bealuštit vearredahkkiid, ja ahte soapmásat šaddet gillát dán dihte – ja gillájit juo sakka.

Muitaleaddji:
Fovsena boazosápmelaččat áššáskuhtte Norgga stáhta ja vuite. Bieggaturbiinnat galge gaikojuvvot. Muhto ii mihkkege dáhpáhuvvan.

Gina Gylver:
Go ledje gollán measta 500 beaivvi dan rájis go Alimusriekti celkkii ahte stáhta rihkku olmmošvuoigatvuođaid, de mii mearrideimmet – Luondu ja Nuorat ja sámi aktivisttat – ahte juoidá fertet dahkat. Fertiimet čalmmustahttit ášši. Danin mearrideimmet čoahkkanit Oljo- ja energiijadepartementii.

Muitaleaddji:
Doppe sii gohtteje njeallje beaivvi, maŋemus jándora borramuša ja juhkosa haga. Dan ija bohte fáhkkestaga buletiijat viežžat sin. Ja juste dalle lei beanta dego Britta-Marakatt Labba dáidda «Garjját» ealáskii.

Gina Gylver:
Dan muittu jáhkán bisánan oaivái agibeaivái. Mii gulláimet fáhkkestaga go 20 buletiija ruvgaledje sisa, bissut gieđain, ja dadje ahte «dii galgabehtet olgun dáppe ovdalgo 15 minuhta leat gollan». Eat hal mii lean báljo oađđán njealji jándoris, mii han das leimmet velohallan láhttis ja stuoluin doppe dan Oljo- ja energiijadepartemeantta feaskáris. De mii čohkedeimmet riekkisin ja vurddiimet dassá go buletiijat guoddigohte min doppe eret.

De juoigagohte sámi aktivisttat. «Garjjat, garjjat, kra, kra, kra». Die de lei jurdda mii badjánii sidjiide go buletiijat bohte sisa. Go lei juste dego diet govva, go buletiijat ruvgalit sisa ja guddet olbmuid eret. Nu ahte diet dáidda lea šaddan earenoamážin midjiide buohkaide geat leimmet doppe, ja maiddái olles Fovsen-akšuvdnii.