Nye tilskot til samlinga juni–september 2025

Nasjonalmuseet har kjøpt inn tre verk frå utstillinga «Taterlandet» på Nitja senter for samtidskunst. Nitja kallar utstillinga «en feiring av kulturen og håndverket til romanifolket/taterne, en av Norges nasjonale minoriteter.» Dette er første gongen kunstnarar av romanifolket/taterne er representert i Nasjonalmuseet si samling.

Liggesletter er stader som taterane har brukt som leirplassar. Desse kulturminna er lite synlege om du ikkje veit kva du ser etter. 

Liggesletter er eit samarbeid mellom Elias Akselsen, Ellef Prestsæter og Espen Tveit. Saman har dei besøkt liggesletter rundt om på Austlandet som Akselsen hugsar frå barndomen. Tveit har dokumentert dei med ein serie fotografi, medan Prestsæter har skrive bildetekstar i form av ein samtale mellom han og Akselsen.

Kastrina er eit mobilt minimuseum, som viser eksempel på taternes handverkskultur frå vår eiga tid.

Verket er laga av ti ulike kunstnarar: Kista er snekra av Roger Johansen og beslått av Johan Johansen. Måleriet på innsida av loket er måla av Ivan Storm Juliussen, medan kaffeutstyret i topplokket er laga av Johan Johansen. 

Kista har fem skuffer som inneheld knivar av Jonny Borge og Elias Akselsen, vispar av Frantz, Jim, Elias og Veronica Akselsen og knivar, svepe og smykke av Johan Johansen.

Nasjonalmuseet har fått 22 teikningar i gåve frå forlaget Cappelen Damm, teikna av Hans Gude, Johan Fredrik Eckersberg, Knud Baade og Ernst Meyer. Ei siste teikning er moglegvis teikna av Kitty Kielland, men det er endå ikkje stadfesta at det stemmer. 

Forlaget har mest truleg hatt teikningane lenge, og dei kan ha blitt nytta som betalingsmiddel i siste halvdel av 1800-talet. Teikningane inngår i ein tradisjon der Nasjonalmuseet samlar på teikningar for å vise breidda i ulike kunstnarskap, og for å legge grunnlaget for vidare forsking på desse.

Videoen Damaged Goods viser ein kvinneleg skikkelse som gjentekne gongar kryp ut av ei stor øskje. Kvar gong er kroppen hennar sett saman av ulike kroppsdelar frå menneskje og dyr. Innimellom ser ein ei naken kvinne på alle fire i eit rom, der ho er mykje større enn møblane i rommet.

Videoen er laga av kunstnarduoen Nathalie Djurberg og Hans Berg, der Djurberg har stått for stop motion-animasjonane medan Berg komponerer musikken og lydbildet i filmen. Kunsten til Djurberg er prega av absurde historier der leirefigurane utforskar kropp, seksualitet, sårbarheit og maktrelasjonar. Det internasjonale gjennombrotet til duoen kom på Veneziabiennalen i 2009, der Djurberg vant Sølvløva for mest lovande unge kunstnar.

Ur er eit tekstilverk med kvitt fargetrykk på svart bomull. Tekstilet heng dobbelt, og har eit ujamt, geometrisk mønster på framsida og eit prikkete mønster på baksida.

Ingrid Bodøgaard er ein av få tekstilkunstnarar som bruker det kjemiske stoffet indigosol i tekstiltrykk. For å lage mønsteret brukar ho sjablongar som ho skjærer ut for hand. Bodøgaard sine verk frå 80- og 90-åra er kjenneteikna av kraftige fargar og figurar, men også abstrakte geometriske mønster med dempa fargar, slik som ein ser i Ur.